Plantun de Prouvènço

Pèr coumpara dos planto d'encò nostre

Helianthemum syriacum & Abies cephalonica

Helianthemum syriacum

Cistaceae

Noms en français : Hélianthème à feuilles de lavande, Hélianthème de Syrie.

Descripcioun :
La massugueto-de-Sirìo es un pichot aubret que trachis dins li garrigo à roumanin proche de mar, sus marlo, argielo o cauquié douloumitique. Li ramo soun argentado e se roumpon eisa. Li fueio, pelouso, soun proun envertouiado sus lou dessouto e longo de 2,5 à 4 cm. Fai de poulido e pulèu gròssi flour jauno amé de petalo pu longo que li sepalo. Se vèi soulamen en basso Prouvènço, coume à l'entour de Marsiho.

Usanço :
Li massugueto èron acampado en Espagno pèr la farmacìo tradiciounalo e soun couneigudo pèr lucha contro li microbe (poulifenòu).

Port : Aubret
Taio : 15 à 50 cm
Fueio : óupousado
Tipe bioulougico : Camefite
Cicle bioulougico : Planto renadivo

Gènre : Helianthemum
Famiho : Cistaceae

Ordre : Malvales

Coulour de la flour : Jauno
Petalo : 5
Ø (o loungour) flour : 1,5 à 2 cm
Flourido : Printèms - Estiéu

Sòu : Ca
Autour basso e auto : 0 à 100 m
Aparado : Noun
Mai à juilet

Liò : Garrigo
Estànci : Termoumediterran à Mesoumediterran
Couroulougi : Éurimediterranenco
Ref. sc. : Helianthemum syriacum (Jacq.) Dum.Cours., 1802 (= Helianthemum lavandulaefolium DC. )

Sapin(-de-Cefalounìo)

Abies cephalonica

Pinaceae

Àutri noum : Sapin(-de-Grèço), Sap, Sapino, Abet, Sapi.

Noms en français : Sapin de Céphalonie, Sapin de Grèce.

Descripcioun :
Lou sapin-de-Cefalounìo trachis naturalamen en Grèço (Cefalounìo). Au nostre es esta planta pèr lou rebouscage. Sèmblo proun à nosto sapino, Abies alba, pamens li fueio soun mai longo (25 mm) e un pau torso sus la fin. Tambèn lou bout de la fueio èi pounchu (fotò). Li bourroun soun resinous. Es un aubre que devèn mens grand (30 m). Coumpara emé lou sapin dóu nostre que ié sèmblo proun.

Usanço :
Dèu agué li mémis usanço que la sapino.